O Concello de Oleiros, dentro do programa
ESCOLAcoeducativa destinado á promoción dos valores da Igualdade nos centros
educativos, organizará este venres día 21 ás 19:00h no Centro Cultural A
Fábrica un acto público de recoñecemento ás mulleres protagonistas dos traballos
presentados polo alumnado de 1º e 2º da ESO ao concurso. Así mesmo, farase entrega do premio ao autor ou autora
do traballo que obtivo unha maior puntuación nas valoracións do xurado.
O Concello de Oleiros, co fin de integrar a coeducación
no quefacer diario dos centros educativos, puxo en marcha un programa de
coeducación para Educar en Igualdade, e traballar así a promoción dos valores
da Igualdade de oportunidades. O programa conta con diversas actuacións que se van desenvolvendo
ao longo do ano, traballándose de forma máis específica datas sinaladas como o
8 de marzo. Entre as actuacións coeducativas previstas para conmemorar o 8 de
marzo estivo a organización do I Concurso “As mulleres da miña vila” dirixido
ao alumnado de 1º e 2º da ESO, no que se lles propuxo que investigasen sobre a
vida das mulleres do noso Concello e fixesen a súa “historia de vida”. A
actividade tivo como finalidade educativa
ampliar o seu coñecemento sobre a historia do Concello, dar a coñecer a
vida das mulleres como protagonistas da nosa historia máis recente, e
visibilizar as desigualdades entre mulleres e homes no ámbito familiar,
laboral, social, etc.
Entre todas as historias de vida
presentadas ao concurso, un xurado composto por persoal da Concellería de
Ensino e Xuventude e membros das ANPAs, tivo a misión de seleccionar a historia
gañadora do premio. Foron varios os criterios que se tiveron en conta á hora de
seleccionar os traballos, pero tiveron un grande peso a creatividade e/ou orixinalidade
na exposición do traballo, o formato de presentación, e a coherencia entre o
traballo e a temática do concurso, entre outros.
Os 25 traballos finalistas recolléranse nunha edición
electrónica que será distribuída entre os centros educativos participantes e
publicarase na páxina web do concello. Así mesmo, cos autores e autoras dos
traballos finalistas gravouse un audiovisual para dar a coñecer os traballos e
facerlles unha homenaxe ás mulleres protagonistas.
A entrega do premio, e o visionado do audiovisual, terá
lugar este venres día 21 de marzo ás 19:00h no Centro Cultural A Fábrica. Neste
acto de portas abertas realizarase un recoñecemento público ás mulleres
protagonistas das historias de vida, pola súa contribución a favor da familia
e/ou pola súa actividade produtiva local. Con esta homenaxe preténdese dar a
coñecer cal era a situación da muller, na historia máis inmediata, e poñer en valor as actuacións de mulleres
que poidan ser motivadoras para a sociedade en xeral.